يا خوفي من اللي جاي اللي راح احنا عارفينه
خد معاه اللي خده نسيبه لربنا وهوه حيدينه
هوة اللي حسابه عسير ويومها مين راح يعينه
ده مال الدنيا في الدنيا ومنها ايه اللي ماخدينه
*****
لكني أنا قلقان والوضع ماهواش مأمون
هتفنا زمان للي كان وحنهتف للي يكون
واللي تفتكره موسى تلاقيه بقى فرعون
تسلم له كل امورك وهوَّ ياعيني يخون
*****
دي المسؤلية عبادة للي يخاف ويتقي ربه
موش منصب لهلابة وللي همه على بطنه
ينهب بقوت الشعوب وهيّ بالعالي تهتفله
يحيا.. يعيش على طول ويحكمنا طول عمره
*****
لكن ده الزمن دوار والدنيا مالهاش أمان
والجبل الوديع الأخضر فجأة يتقلب بركان
والوحش اللي بينهشك بالأصل كان انسان
الكره عمى عينيه والحب ملقاش بقلبه مكان
*****
ليه اللي طعميته بمحبة يعضني كده بايدي
واللي حميته بروحي يكون سبب بتهديدي
يفرح لدموع عيوني ويأذيني في يوم عيدي
ربي أنا اتكلت عليه ولا حدش سواه سيدي
*****

هل لديك سؤال عن الإيمان المسيحي؟ نحن مستعدون لاجابتك. راسلنا