يا مصر انت اللي باقية ..  برغم كل الظروف
ورايتك حتبقي عالية واسمك ضاوي الحروف
ما دامت ولادك صاحية . بالملايين ...وبالألوف
تدّورلك قلوبها ساقية ما تعرفش قلق او خوف
**********
يا مصر انت اللي باقية .. وكلهم أكيد ماشيين
دول اللي اغتصبوا بهية ...واستباحوا دم ياسين
واللي باعوا بفلوس القضية ... وزوروا في الدين
ولاجل عيونك يا صبية ...ولادك الاحرار راجعين
**********
يا مصر يا ام الغلابة دة خيرك عمار على طول
ليه تبقى حتة صحابة ناهبة لوحدها المحصول
فاكرين عايشة في غابة فيها الضعيف مقتول
وهمة يا ناس شلة ديابة   وشغالين بامر الغول
***********
اليوم نيلك بيضحك .... وعلى الضفاف حاضرين
جدعان بلون شمسك وارواحم عالكتاف شايلين
حالفين ليرجعوا مجدك اللي افتقدتيه من سنين
ويتمتعوا من تاني بعزك . ..وكانوا منه محرومين
**********
شبابك اليوم دة فتح .. عينيه وفاق من التخدير
كسرالسلاسل من ايديه .. ونزل ميدان التحرير
حلف وكان ندر عليه .. ما يرجعشِ بدون تغيير
حقق مراده بعزم ماليه .. والرب كان له اعز نصير
**********
يا مصر انت مهد الحضارة , وانت ام الشعوب
وأهراماتك دي أكبر أمارة , وأبو الهول ألمهوب
بكرة حتقوم فيكِ ادارة ... وتصحح كل العيوب
وطول مالأرض دوارة ... حتفضلي جوة القلوب

هل لديك سؤال عن الإيمان المسيحي؟ نحن مستعدون لاجابتك. راسلنا