ورجعت اكتب من تاني
في نفس الموضوع الاولاني
ياما ضعفت وضليت
وراح فكري ومليت
مديت لي ايدك ورديت
لقلمي يرجع يكتب تاني

يكتب في نفس الموضوع الاولاني
يكتب ويقول تاني وتاني
ياما هربت نفسي بعيد
وحسيت اني بليد
رديتني من جديد
ارجع واكتب من تاني

اكتب في نفس الموضوع الاولاني
اكتب ان صوتك في مرة جاني
قاللي ماتخفش انا وياك
انا ليك انا اللي معاك
انا اللي باقيلك في دنياك
ومن حزني ردني تاني

اكتب في نفس الموضوع الاولاني
ان انت اللي في حزني عزاني
وادى لقلبي رجا
ورجائي دا في السما
وفي السما كل الهنا
مش هاعوز اكتب تاني

ولا حتى في نفس الموضوع الاولاني
خلاص مفيش مواضيع تاني
كل الموضوع اني اشوفك
واحط راسي بين كفوفك
وابص دايما على عيونك
ساعتها هاكتب من تاني

بس المره دي في موضوع تاني
ان عينيك دايما محيراني
هافضل ابص فيها على طول
للابد والابديه تطول
اتفرس دايما واقول
اشعار من نوع تاني

هل لديك سؤال عن الإيمان المسيحي؟ نحن مستعدون لاجابتك. راسلنا