حاقول حكاية غريبة بس ماتستغربشي ...
اصل الحكاية عجيبة برضك ماتستعجبشي
حكاية تخصك يا سامع أيوة ما تستبعدشي
اسمع وافهم كلامي أرجوك ما تستعجلشي
*******
كان في زمان صبية عذراء واسمها مريم
عاشت طاهرة ونقية وعالبر كبرت تتعلم
جالها ملاك وسلم وببشرى عظيمة اتكلم
طاعت مشيئة الاله ولأمره تستسلم
*******
كانت يوميها مخطوبة للناصري يوسف النجار
عرف حقيقة خطيبته وقال ... يا رب يا ستار
جاله الملاك في حلمه وقال له ... ليه تحتار
دة اللي حبلت بيه ابن الاله البار
*******
ارتاح الجدع من حيرته وصفا للاله نواياه
اتجوز قوام الصبية ولا حدش سمع شكواه
وعاشت معاه عفيفة في بيته بظل حماه
وقال راضي بنصيبي وقابل بحكم الله
*******
وبأمر من القيصر كان الإكتتاب مستعجل
كل واحد في بلده وعشيرته لازم يتسجل
اخد يوسف مراته وعلى بيت لحم واتسهل
لفوا البلد ما لقيوش ولا اوضة في منزل
*******
وفي مغارة وضيعة ودة اللي كان موجود
هناك جالها المخاض واتحققت الوعود
وفي مذود للبقر... وضعت مريم المولود
فرحت بشوفة خلاصها وشكرت ربها المعبود
*******
ليلتها كان في رعاة سهرانة بتحرس رعيتهم
شافوا ملاك في السما بانت قوام رعبتهم
قال ... ما اتخافوش وخبرهم ببشرى سرتهم
في بيت لحم اتولد يسوع المسيح مخلصهم
*******
وفجأة في السما ظهرت ملايكة يرنموا بأنغام
المجد لله في العلا ... وعلى الأرض السلام
وبالناس المسره ... تركوا الرعاه الأغنام
جريوا شافوا الصبي وبمولدو تحققت الاحلام
*******
ولما المجوس شافوا نجمة في السما تلالي
قالوا دي لمولد ملك وشدوا الرحال طوالي
دهب ولبان ومر هدايا جابوها للغالي
ودلتهم عليه النجمة سجدوا ومجدوا العالي
*******
كل ده ويوسف ... يستقبل الزوار ...
يشوف ويسمع كلامهم مستعجب علّي صار
ومريم فاهمه القضية حافظه بقلبها الاسرار
عارفه ان اللي اتولد حيواجه الاخطار
*******
وآدي الحكاية يا بشر بقى لها الفين عام
حكاية ولادة عجيبة ولادة رئيس السلام
الي اتولد في عالمنا واتحمل لأجلنا الآلام
وداق الموت عشانا وبنصرة من الموت قام
*******
وهوة عايش ليومنا بيدعوا كل الأنام
افتحوا ابواب قلوبكم يخلصكم للتمام
تنولدوا ولادة جديدة وتعيشوا معاه بوئام
بوجه كلامي يا ريتكم تفهموا معنى الكلام
********
وكل عام وانتم بالف خير

هل لديك سؤال عن الإيمان المسيحي؟ نحن مستعدون لاجابتك. راسلنا