خدني في فلكك يا نوح

خدني في فلكك يانوح وياك مطرح ماتروح
ايه اللي اخدته مالدنيا غير المآسي والجروح
غير الخيانة من حبايب والكره في عنيهم يلوح
واللي ايحرموه عليك ليهم وحدهم مسموح
***
خدني أبقى عن يمينك وسيبك م اللي سايبينك
اللي اشتريتهم بالنفيس وبالرخيص همة بايعينك
خلي اتكالك عالأمين وماتخافشي من عدوينك
دة اللي شايفه بعيونك مكتوب أهو على جبينك
***
قبلك ياما كانو كتير جم برسايل التحذير
ولا حدش سمع منهم ولا فاقوا من التخدير
فاكرين الدنيا دايملهم وعلى الدنيا مفهش كبير
تذل العالي في لحظة ينام سلطان ويصحا أسير
***
وفلكك دة هوة المسيح وكلامه مفهوم وصريح
ينادي لكل التعبانين ولكل مطعون وجريح
وفلكك لسه في المينا بيعلا فيه غنا وتسبيح
والي يقبل ويجي له يبات في حضنه مستريح