كل يوم لينا ضحايا

يارب ايه هيّة الحكاية ... في كل يوم لينا ضحايا ...
موش بعاتبك عللي صار ... أو ليّا عليك شكاية ...
*************
بس عايزك تبقى جنبي ... وأنا بودع حبايبي ...
تمسح لي دموع عيوني ... وتخفف عن قلبي قساية...
************
دم عرسان وعرايس ... غطا جدران الكنايس ...
زي دمك يوم ما سال ...لأجل تغفر ليّ خطاية ...
************
والعيال من كل جيل ... وعجوزة فاتحة الانجيل ...
اقبلني يا رب بملكوتك ... وآدي كانت آخر قراية ...
************
جيت عشان تشفي الجروح ... ولأجل تفدي كل روح ...
واللي قبلك وحامل اسمك ... حسبوها ليه جناية ...
***********
ذنبنا اننا أولاد محبة ... وكل الشعوب لينا أحبة ...
ليه كرههم يزداد علينا ... عايزن نكون ليهم سبايا ...
**********
ربي الجأ لك وعارف ... انك تشجع كل خايف ...
تملا له قلبه بالأمان .... وتثبته فيك للنهاية ...
*********
وأديني برفع صلاتي ... دلوقتي وليوم مماتي ...
تهدي عدوي لطريقك ... وأشوفه في السما معايه ..